برفانی طوفان امریکی شمال مشرقی علاقے سے ٹکرا گیا

Posted: 23/01/2012 in All News, Health & Sports News, Survey / Research / Science News, USA & Europe

نیو یارک: تیز رفتار ہواؤں کے ساتھ آنیوالا برفانی طوفان امر یکا کے شمال مشرقی علاقے سے ٹکرا گیا۔ سفید چادر نے ہر شے کو ڈھانپ لیا جبکہ نظام زندگی درہم برہم ہونے سے شہریوں کی مشکلات میں اضافہ ہوگیا۔ اطلاعات کے مطابق شدید برفانی طوفان نے وسطی پنسلو ینیا سے کنیٹیکٹ تک ایک بڑے علاقے کو متاثر کیا ہے۔ نیویارک، فلاڈلفیا، بوسٹن اور واشنگٹن سمیت کئی علاقوں میں برفباری ہوئی۔ کئی مقامات پر سڑکیں اور عمارتیں برف سے ڈھک گئیں۔ فلاڈلفیا انٹرنیشنل ائیرپورٹ کی ترجمان نے بتا یا کہ انھیں چھیاسٹھ پروازیں منسوخ کرنی پڑیں۔ سیاٹل کے جنوب میں دو لاکھ سے زائد گھر اور متعدد تجارتی مقامات برفباری کے باعث بجلی سے محروم ہوگئے۔ اس سال موسم سرما میں امریکا کی کئی ریاستیں غیر معمولی سردی اور برفباری کی لپیٹ میں ہیں۔ پینسلوینیا سے نیویارک تک مسلسل برفباری سے معمولات زندگی بری طرح متاثر ہوچکے ہیں برفباری کے باعث سڑکیں بند ہوگئی ہیں جس سے لوگوں کو سفر میں شدید مشکلات کا سامنا کرنا پڑ رہا ہے۔ بھاری سامان لیجانے والے ٹرک برفباری کے باعث پھنس کر رہ گئے ہیں۔ تمام تر مشکلات کے باوجود کئی شہروں میں لوگوں کی بڑی تعداد برفباری سے لطف اندوز ہوتی رہی۔ نیویارک شہر میں اب تک تین سے پانچ انچ تک برف پڑچکی ہے۔ فلاڈ یلفیا میں دو سے چار انچ بوسٹن میں تین انچ موٹی برف کی تہہ جم چکی ہے۔

Comments are closed.