انڈونیشیا میں امام بارگاہوں کی آتشزدگی اسلام دشمن قوتوں کی کارستانی ہے، ٹی این ایف جے

Posted: 02/01/2012 in All News, Important News, Local News, Pakistan & Kashmir, Religious / Celebrating News, Russia & Central Asia

تحریک کی منظور کردہ ایک قرارداد میں سمپانگ انڈونیشیا میں امام بارگاہوں کی آتشزدگی کی پرزور مذمت کی گئی اور اسے مسلمانوں میں تفریق ڈالنے کی اسلام دشمن سازش قرار دیا گیا۔سکینہ بنت الحسین ع کی پاکیزہ سیرت ہر صاحب دل اور باضمیر انسان کیلئے راہ ہدایت کی نوید ہے۔ ان خیالات کا اظہار ٹی این ایف جے لوکل کونسل غریب آباد کے زیراہتمام قصر رباب س  میں منعقدہ مجلس عزائے معصومہ سکینہ بنت الحسین ع سے خطاب کرتے ہوئے مختلف علماء و ذاکرین نے کیا۔  سید حامد علی شاہ موسوی کے اعلان پر عشرہ شہیدہ زنداں کی مناسبت سے منعقدہ مجلس میں راولپنڈی ڈویژن سے ہزاروں عزاداروں نے شرکت کی۔  مجلس عزا سے خطاب کرتے ہوئے علامہ محسن ہمدانی نے کہا کہ شہیدہ زنداں معصومہ سکینہ بنت الحسین کی مظلومانہ شہادت حق و باطل کا میزان ہے، جس نے ظلم و جبر کے چہرے سے منافقت کا نقاب اتار پھینکا اور انسانیت کا درد رکھنے والوں کو ظلم کے مقابل کھڑا ہو جانے پر مجبور کر دیا۔ علامہ قمر حیدر زیدی نے کہا کہ شہادت سکینہ س تاریخ انسانی میں مظلومیت، صبر اور عزم و عمل کا ایسا باب ہے جس کی نظیر پیش کرنا ناممکن ہے۔ معروف سکالر چوہدری مشتاق حسین نے کہا کہ دنیا کا دستور ہے کہ کسی کی بھی توجہ، خوشنودی اور ہمدردی حاصل کرنے کیلئے اس کی پیاری چیز کے ساتھ محبت عقیدت اور وابستگی کا اظہار کیا جائے، لہذا اگر عالم اسلام کو بھی رسول اکرم ص کی شفاعت حاصل کرنی ہے تو اسے رسول ص کی پیاری آل کے ساتھ اپنے دامن کو وابستہ کرنا ہوگا۔ انہوں نے کہا کہ  آغا سید حامد علی شاہ موسوی کی جانب سے عشرہ شہیدہ زنداں منانے کا اعلان محمد وآل محمد ص کے ساتھ محبت و مودت کی عملی دلیل ہے۔ اس موقع پر منظور کردہ قراردادوں میں کوئٹہ میں بم دھماکے اور سرجن ڈاکٹر باقر شاہ کے قتل کی پرزور مذمت کی گئی اور وزیر داخلہ سے اپیل کی گئی کہ وہ ہر قتل اور دہشتگردی کو ذاتی اور علاقائی رنگ دینے کی روش سے گریز کریں، ایسے بیانات اصل حقائق پر پردہ ڈالنے کے مترادف ہیں اور سانحات کی آزادانہ تحقیقات کروائیں۔ قرارداد میں اس امر پر افسوس کا اظہار کیا کہ امن عامہ کی بگڑتی صورتحال کے سبب عوام ہجرت پر مجبور ہو چکے ہیں جو حکومتی ناکامی کا منہ بولتا ثبوت ہے۔ ایک قرارداد میں سمپانگ انڈونیشیا میں امام بارگاہوں کی آتشزدگی کی پرزور مذمت کی گئی اور اسے مسلمانوں میں تفریق ڈالنے کی اسلام دشمن سازش قرار دیا گیا۔

Comments are closed.