کراچی:صفورا چورنگی کے قریب دھماکا، تین رینجرز اہلکار شہید

Posted: 10/12/2011 in All News, Important News, Local News, Pakistan & Kashmir

کراچی کے علاقے گلستان جوہر میں سڑک کے کنارے نصب بم کے دھماکے میں رینجرز کے تین اہلکار شہیدجبکہ چار زخمی ہوگئے۔دھماکے سے رینجرز کی گاڑی اورقریب کی عمارتوں کو بھی نقصان پہنچا۔ پولیس کے مطابق ضلع ملیر کے سچل تھانے کی حدود میں صفورا چورنگی کے قریب دہشت گردوں نے سڑک کے کنارے بم نصب کرکے ڈیوٹی پر موجود بھٹائی رینجرز کی گاڑی کو نشانہ بنایا۔ دھماکا صبح سات بجکر 25 منٹ پر کیا گیا جس کے نتیجے میں 30 فٹ کے فاصلے پر موجود رینجرز کی گاڑی کو شدید نقصان پہنچا جس میں ڈیوٹی دینے والے نائیک عبدالرشید، ڈرائیور محمد ابراہیم اور سپاہی اعجاز احمد شہید جبکہ نائیک اعظم، لانس نائیک محمد اسلم، سپاہی الطاف اورفاضل جاوید زخمی ہوگئے جن میں ایک کی حالت تشویش ناک ہے۔ انہیں سی ایم ایچ ملیر منتقل کیا گیا۔ پولیس اور رینجرز حکام کے مطابق دھماکے میں رینجرز اہلکار ٹارگٹ تھے۔ دھماکے کے نتیجے میں قریب سے گزرنے والی متعدد گاڑیوں اور قریبی اسکول اور رہائشی عمارتوں کو بھی نقصان پہنچا۔ پولیس حکام کے مطابق دھماکے کیلئے تقریباً تین کلو گرام دھماکہ خیزا مواد استعمال کیا گیا، جسے بال بیرنگ اور دیگر اشیاء سے تیار کیا گیا تھا۔ پولیس کے مطابق بم دھماکا کراچی میں 5 اور 6دسمبر نو محرم الحرام اور یوم عاشور کے موقع پر لائنز ایرایا اور کالا پل پر ہونے والے دھماکوں سے مماثلت رکھتا ہے۔ واقعے کی تحقیقات کی جارہی ہے۔

Comments are closed.